ភ្នំពេញ៖ ព័ត៌មានបន្ថែមៈ ពេលបង្ក្រាបគ្រឿងញៀនមានករណីផ្ទុះអាវុធពីក្រុមជនសង្ស័យជាច្រើនគ្រាប់ បាញ់មកលើកងកម្លាំង បណ្តាលឱ្យមន្ត្រីនគរបាលសក្តិ៤ម្នាក់បានស្លាប់។ហេតុការណ៍នេះបានកើតឡើង នៅបុរីមួយក្នុងសង្កាត់ព្រៃស ខណ្ឌដង្កោ កាលពីយប់ថ្ងៃទី២៨ ខែធ្នូ។
សមត្ថកិច្ចបានឱ្យដឹងថា មន្ត្រីនគរបាលបាត់បង់ជីវិតឈ្មោះ ម៉ិច ឆាយភីវ័យ អាយុ៣៤ឆ្នាំឋានន្តរសក្ដិ វរសេនីយ៍ត្រី តួនាទីនាយរងការិយាល័យផ្សព្វផ្សាយអប់រំ ក៩.៣ នៃមន្ទីរប្រឆាំងគ្រឿងញៀនអគ្គស្នងការនគរបាលជាតិ មានទីកំណើតភូមិពោធិ៍ ឃុំពោធិ៍ ស្រុកត្បែងមានជ័យ ខេត្តព្រះវិហារ ។
មុនកើតហេតុ កម្លាំងមន្ទីរប្រឆាំងគ្រឿងញៀន ក៩.៣ បានចុះបង្ក្រាបករណីគ្រឿងញៀនក្នុងបុរីមួយ នៅសង្កាត់ព្រៃស។ជនសង្ស័យមួយក្រុមបានដឹងខ្លួនក៏ប្រើកាំភ្លើងបាញ់ជាច្រើនគ្រាប់លើកងកម្លាំងចំត្រង់ក នាយរងការិយាល័យម្នាក់រងរបួសធ្ងន់ត្រូវបានបញ្ជូនទៅសង្គ្រោះនៅមន្ទីរពេទ្យ តែជាអកុសលជនរងគ្រោះបានស្លាប់បាត់ទៅហើយ។
បន្ទាប់ពីបាញ់សមត្ថកិច្ចរួចហើយ ក្រុមជនសង្ស័យបានបើករថយន្តម៉ាក TOYOTA ALPHARD ផ្លាកលេខ ភ្នំពេញ 2BG-0366 នាំបក្ខពួករត់គេច រហូតដល់ផ្លូវ៦០ម៉ែត្រ សមត្ថកិច្ចខណ្ឌដង្កោក៏បានឃាត់រថយន្ដនិងចាប់ជនសង្ស័យ៣នាក់។ក្នុងនោះមានស្រីម្នាក់និងដកហូតរថយន្តមួយគ្រឿងយកសាកសួរទើបដឹងថា ជនដៃដល់ដែលបាញ់នគរបាលឱ្យស្លាប់ជាជនបរទេសបានចុះពីលើរថយន្តនៅម្តុំវត្តហារ ហើយរត់គេចខ្លួនបាត់។សមត្ថកិច្ចឆែកឆេររកឃើញ៖កាំភ្លើង៣ដើមនិងសម្ភារពាក់ព័ន្ធបទល្មើស មួយចំនួន ហើយនាំជនសង្ស័យទាំងនោះទៅមន្ទីរប្រឆាំងគ្រឿងញៀនដើម្បីបន្តនីតិវិធី៕ដោយ៖វិចិត្រ